Psevdorin

Dərman vasitəsinin istifadəsi üzrə təlimat (xəstələr üçün)

PSEVDORİN tablet
PSEVDORİN

Beynəlxalq patentləşdirilməmiş adı: Ibuprophenum+ Pseudoephedrinum

Tərkibi
Təsiredici maddə: Hər tabletin tərkibində 200 mq ibuprofen və 30 mq psevdoefedrin hidroxlorid vardır.
Köməkçi maddələr: Susuz kalsium hidroortofosfat, mikrokristallik sellüloza, Na kroskarmelloza, povidon, susuz kolloidal silisium dioksid, maqnezium stearat.

Farmakoterapevtik qrupu
Kombinəolunmuş antikongestantlar. QSİƏV- propion turşusu törəmələri kombinasiyaları.

ATC kodu: R05X

Farmakoloji xüsusiyyətləri

Farmakodinamikası 
Tərkibinə ibuprofen və psevdoefedrin hidroxlorid daxil olduğuna görə ağrıkəsici, qızdırmasalıcı, xüsusiyyətlərinə malikdir.
Psevdoefedrin hidroxlorid birbaşa və dolayı təsirə malik simpatomimetik maddədir. Psevdoefedrin hidroxlorid α- və β-adrenergik reseptorlara, eləcə də sinir sisteminə stimuləedici təsirə malikdir. Onun simpatomimetik təsiri damardaraldıcı effekt göstərərək burun tıxanaqlığını aradan qaldırır.

İbuprofen iltihab nahiyəsinə induksiya edilmiş leykosit miqrasiyasının da qarşısını alır.   İbuprofenin qızdırmasalıcı təsiri hipotalamusda prostaglandinlərin mərkəzi inhibəsi ilə yaranır. İbuprofen trombositlərin aqreqasiyasının qarşısını alır. İnsanlarda ibuprofen iltihabı, ağrıları, ödemi və qızdırmanı aradan qaldırır.

Farmakokinetikası
Psevdoefedrin hidroxlorid mədə-bağırsaq traktından sürətlə və demək olar ki, tamamilə sorulur. Peroral yolla məhlul şəklində qəbul edildikdə maksimal plazma konsentrasiyası 1,5-2 saat müddətində toplanır. Psevdoefedrin hidroxloridin yarımxaricolma müddəti 5-8 saat təşkil edir. Qaraciyərdə qismən metabolizə olunur. Orqanizmdən əsasən dəyişilməmiş şəkildə (az miqdarda metabolitlə birlikdə) sidiklə xaric olur.

İbuprofen mədə-bağırsaq traktından yaxşı sorulur və plazma zülalları ilə birləşmə faizi yüksəkdir. İbuprofen sinovial mayeyə diffuziya edir. Preparatın tərkibindəki ibuprofenin plazma səviyyəsi 5 dəqiqədən sonra aşkar edilir, plazmadakı pik konsentrasiyası acqarına qəbul edildikdən 1-2 saat sonra əldə edilir. Preparatın qida ilə qəbulu zamanı, plazmadakı ibuprofenin pik konsentrasiyası aşağı olur və 25 dəqiqə gecikir, lakin ümumi sorulma dərəcəsi ekvivalent olur.

İbuprofen əsasən qaraciyərdə metabolizmə uğrayır, 2 əsas metaboliti əmələ gəlir. Orqanizmdən ya təmiz halda, ya da metabolitlər şəklində əsasən böyrəklər vasitəsilə xaric olunur.

Yarımxaricolma dövrü təxminən 2 saatdır. Məhdud tədqiqatlarda ibuprofen çox aşağı konsentrasiyalarda ana südündə görünür. Yaşlılarda ibuprofenin farmakokinetik profilində əhəmiyyətli fərqlər müşahidə olunmur. 

İstifadəsinə göstərişlər
Preparat soyuqdəymə, qrip və digər yuxarı tənəffüs yollarının infeksiyalarında müşahidə olunan və aşağıda sadalanan simptomların aradan qaldırılması üçün istifadə olunur:

• halsızlıq
• hərarət və baş ağrısı
• rinoreya
• burun tutulması
• asqırma
• bədən ağrıları.

Əks göstərişlər
Aşağıda qeyd olunan hallarda preparatı istifadə etmək olmaz:

• Preparatın hər hansı komponentinə qarşı yüksək həssaslıq varsa,
• ağır qaraciyər çatışmazlığı,
• ağır böyrək çatışmazlığı,
• Asetilsalisil turşusu (aspirin) və digər qeyri-steroid iltihab əleyhinə dərmanların istifadəsi zamanı astma, ürtiker və ya allergik tipli reaksiyalar olubsa;
• müalicə olunmamış mədə və onikibarmaq bağırsaq xorası varsa,
• bağırsağın iltihabi xəstəliyi zarsa (xoralı kolit, Kron xəstəliyi),
• hamiləliyin gec mərhələlərində (6 aydan sonra),
• aortokoronar şuntlama əməliyyatı keçirmisinizsə;
• yüksək qan təzyiqi və ÜİX kimi xəstəlikləriniz varsa,
• beyin damarlarında qanaxma və ya digər aktiv qanaxma varsa,
• depressiya və ya əhval pozğunluqlarının müalicəsi üçün MAO- inhibitorundan istifadə edirsinizsə və ya son 14 gün ərzində istifadə etmisinizsə,
• ağır ürək çatışmazlığınız var,
• antidepressantların, göz və ya bağırsaq xəstəliklərinin müalicəsində istifadə edilən atropin kimi dərmanlar, tərkibində alfa və ya beta blokator olan qan təzyiqini aşağı salan  preparatlar, qanın laxtalanma sisteminə təsir göstərən preparatlar, astmanın müalicəsində istifadə edilən dərmanlar, iştahı azaldan dərmanlar, moklobemid istifadasi, əhval pozğunluqlarının müalicəsində və ya migrenin müalicəsində istifadə edilən erqotamin kimi preparatatlarda hər hansı birinin qəbulu,
• 12 yaşdan kiçik uşaqlar

Xüsusi göstərişlər və ehtiyat tədbirləri
Aşağıda qeyd olunan hallarda ehtiyatlı olmaq lazımdır:

• Ağrı, qızdırma və iltihabəleyhinə təsirli  hər hansı bir preparartla eyni vaxtda istifadəsindən çəkinin.
• Mədə ağrısı olarsa, bu dərmanı istifadə etməyi dayandırın və həkiminizlə əlaqə saxlayın.
• Əgər sizdə ciddi mədə-bağırsaq pozğunluğu  varsa, müalicə kursunun istənilən vaxtında ciddi qanaxma, xoralar və ya zədələnmələr inkişaf edə bilər. Qanamanın növündən asılı olaraq nəcisin qaralması, ağızdan qanaxma və həzm pozğunluğu əlamətləri ola bilər. Buna görə də, xora və qanaxma kimi ciddi mədə-bağırsaq xəstəlikləri zamanı, müalicə ən az doza ilə aparılmalıdır və müalicəyə (misoprostol və ya proton pompası inhibitorları) kimi profilaktik müalicə əlavə olunmalıdır.
• Dərinin qabıqlanması, selikli qişanın zədələnməsi və ya dəridə müşahidə olunan yüksək həssaslıq reaksiyaları hallarında preparatın istifadəsini dayandırmalısınız, mümkün qədər tez həkiminizlə əlaqə saxlayın.
• Üz və boğazın şişməsi ilə nəticələnən allergiya, tənəffüs çətinliyi, bronxların daralması kimi həssaslıq hallarında ehtiyatlı olmaq lazımdır.
• Bədən səthində göyərmələr baş verərsə həkiminizlə əlaqə saxlayın.
• Qəfil üşümə və qızdırma, yorğunluq, baş ağrısı və qusma və ya boyun nahiyəsində sərtlik yarandıqda dərhal həkimə müraciət edin; çünki bu meningitin (aseptik meningit) simptomları ola bilər 
• Preparat böyrək xəstəliyi olan xəstələrdə ehtiyatla istifadə edilməlidir.
• Preparat qaraciyər testlərində yüksəlməyə səbəb ola bilər. 
• İbuprofen qanda trombositlərin aqreqasiyasını azaltmaqla qanaxma vaxtını uzada bilər, ona görə də əgər sizdə laxtalanma pozğunluqları varsa, bu preparatla müalicəni həkim nəzarəti altında davam etdirməlisiniz.
• Bu preparatın istifadəsi zamanı görmə pozğunluğu inkişaf edərsə, göz müayinəsi aparılmalıdır.
• Əgər sizdə  ağrı, qızdırma və iltihaba qarşı istifadə edilən dərmanların səbəb olduğu mayenin orqanizmdə ləngiməsi ilə bağlı probleminiz varsa, arterial təzyiqin qalxması və ürək çatışmazlığı zamanı bu preparatı istifadə edərkən diqqətli olmalısınız.
• Ürək xəstəliyi və ya ürək xəstəliyi riskiniz varsa (məsələn, yüksək qan təzyiqi, şəkərli diabet) və ya qanda xolesterin yüksəkdirsə, siqaret çəkirsinizsə, göstərilən gündəlik dozanı aşmayın.
• Ağrı, qızdırma və iltihaba qarşı təsirli olan digər dərmanlar kimi, bu preparat da infarkt və ya insult kimi ölümlə nəticələnə bilən ciddi yan təsirlərə səbəb ola bilər. Bu ağırlaşmalar  heç bir simptom olmadan baş verə bilsə də, döş qəfəsində ağrı, nəfəs darlığı, danışmaqda çətinlik çəkdiyiniz zaman həkiminizlə əlaqə saxlayın.
• Səbəbsiz çəki artımı və ya ödem (topuqların şişməsi) halında həkiminizlə məsləhətləşin.
• 5 gündən çox istifadə etməyin.
• Əgər 60 yaşdan yuxarısınızsa, ehtiyatlı olmaq lazımdır.
• Prostat vəzinin böyüməsi və sidik kisəsi funksiyasının pozulması halında ehtiyatlı olmaq lazımdır.
• Qalxanabənzər vəzinizin hiperfunksiyası, gözdaxili təzyiqinin artması, şəkərli diabet zamanı ehtiyatlı olmaq lazımdır.
• Feoxromasitoması olan xəstələrdə adrenalinin səviyyəsi arta bilər.
• Əgər sizdə birləşdirici toxuma xəstəliyi olan sistem qırmızı qurdeşənəyi varsa, bu dərmanı istifadə etməzdən əvvəl həkiminizlə məsləhətləşin.
• Yaşlılarda qanaxma və mədə-bağırsaq traktının perforasiyası kimi ciddi yan təsirlərin tezliyi xüsusilə yüksək olduğundan ehtiyatla istifadə edilməlidir.
• Əgər idmançısınızsa, bu, dopinq testinin müsbət çıxması ilə nəticələnə bilər.
• Psevdoefedrin də daxil olmaqla, simpatik sistemi stimulə edən dərmanlarla eyni vaxtda istifadə edildikdən sonra nadir hallarda qəfil başlayan şiddətli qarın ağrısı, ürəkbulanma, qusma və görmə pozğunluqları baş verə bilər. Bu şikayətlər zamanı psevdoefedrin terapiyası dərhal dayandırılmalıdır.
• QT sindromu (ağır ürək ritm pozğunluqları və qəfil ölümlə nəticələnə bilər) və Torsades de Pointes diaqnozuna (həyatı üçün təhlükə yaradan qeyri-müntəzəm ürək ritmi) klinik şübhə olduqda preparat ehtiyatla istifadə edilməlidir.

Digər dərman vasitələri ilə qarşılıqlı təsiri 
Aşağıda qeyd olunan hallarda ehtiyatlı olmaq lazımdır.

• Antihipertenziv dərmanlarla eyni vaxtda istifadəsi onların qan təzyiqini aşağı salan təsirlərini azalda bilər.
• Varfarin və ya heparin kimi antikoaqulyantlarla eyni vaxtda istifadəsi onların antikoaqulyant təsirini artıra bilər. 
• Aspirin, naproksen, selekoksib və COX-2 inhibitorları da daxil olmaqla nimesulid kimi qeyri-steroid iltihabəleyhinə preparatlarla eyni vaxtda istifadədən çəkinmək lazımdır, çünki bu, əlavə təsirlərin riskini artıra bilər.
• Kortizon preparatları  ilə birlikdə qəbul edildikdə mədə-bağırsaq traktının xorası və qanaxma riski arta bilər.
• Aminoqlikozidlər qrupu antibiotiklərlə (məsələn, gentamisin, kanamisin, streptomisin) eyni vaxtda istifadəsi onların xaric olmasını azalda bilər, nəticədə əlavə təsirlərin artmasına səbəb olur.
• Xolestiraminlə eyni vaxtda istifadəsi preparatın təsirini gecikdirə bilər.
• Diuretik dərmanlarla (məsələn, furosemid, tiazid) birlikdə istifadə edildikdə diuretik təsir azala bilər və böyrək çatışmazlığı riski arta bilər.
• İmmunitet sistemini zəiflədən siklosporin və takrolimus ilə birlikdə istifadə edildikdə, böyrək çatışmazlığı riskini artıra bilər.
• Mifepristonla  eyni vaxtda istifadəsi mifepristonun effektivliyini azalda bilər.
• İnsan immunçatışmazlığı virusu (İİV) daxil olmaqla retroviruslara təsir göstərən zidovudinlə birlikdə istifadə edildikdə qan xəstəlikləri riskini artıra bilər.
• Litium duzları ilə birlikdə istifadə edildikdə qanda litium səviyyəsinin artması və bununla əlaqədar əlavə təsirlər baş verə bilər.
• Xinolon antibiotikləri (məsələn, siprofloksasin) ilə birlikdə istifadə edildikdə, əzələlərdə qıcolma riski arta bilər.
• Ürək qlikozidləri (məsələn, digoksin, digitoksin) ilə birlikdə istifadə edildikdə, bu dərmanların ifrazına təsir göstərərək qanda səviyyəsinin artmasına və ürək ritminin pozulmasına səbəb ola bilər.
• Antikoaqulyantlarla (məsələn, aspirin, dipiridamol, klopidoqrel) və depressiya üçün istifadə edilən selektiv serotoninin geri tutulmasının inhibitorları (məsələn, fluoksetin, fluvoksamin, paroksetin, sertralin) ilə birlikdə istifadə edildikdə  MBT-də qanaxma riskini artıra bilər.
• Sulfonilsidik cövhəri preparatları ilə müalicə zamanı çox nadir hallarda hipoqlikemiya halları müşahidə edilmişdir.
• Xüsusilə, qaraciyərdə dərmanları metabolizə edən ferment olan CYP2C9-u  inhibə edən dərmanlarla (məsələn, vorikonazol, flukonazol) yüksək dozada ibuprofenin eyni vaxtda istifadəsi ibuprofenin dozasını azaltmaq üçün nəzərə alınmalıdır.
• Bu preparat burun tıxanıqlığını aradan qaldıran dərmanlarla, trisiklik antidepresanlarla (məsələn, amitriptilin, mortriptil imipramin və desipramin), iştahı azaldan dərmanlarla və bəzi sinir sistemini stimullaşdıran dərmanlarla və ya MAO inhibitorları ilə eyni vaxtda istifadəsi bəzən qan təzyiqinin qalxmasına səbəb ola bilər. Bretilium, betanidin, quanetidin, debrisokin, metildopa və alfa və beta-adrenergik blokerlər kimi dərmanların qan təzyiqini aşağı salma təsiri qismən azala bilər, çünki PSEVDORİN-in tərkibinə psevdoefedrin daxildir. Moklobemid ilə eyni vaxtda istifadəsi hipertenziv krizə səbəb ola bilər.
• Çovdar mahmızı alkaloidləri ilə (miqrenin müalicəsində istifadə olunan erqotamin və metisergid) eyni vaxtda istifadəsi əlavə təsirlərin riskini artırır.
• Doğuşu asanlaşdırmaq üçün istifadə edilən oksitosinlə eyni vaxtda istifadəsi hipertoniya riskini artırır.
• İbuprofenin və digər  ağrı, qızdırma və iltihabəleyhinə təsiri olan preparatlar arterial təzyiqin müalicəsində istifadə olunan dərmanların effektivliyini azalda bilər və ACE inhibitorlarının böyrəklərə zədələyici təsirini artıra bilər.
• Preparatın metotreksat və antidepresanlarla eyni vaxtda istifadəsi qanda konsentrasiyanı artıra və arzuolunmaz əlavə təsirlərə səbəb ola bilər.
• Ginkgo biloba kimi bitki ekstraktları ilə eyni vaxtda istifadəsi mədə-bağırsaq traktında qanaxma riskini artıra bilər.

Əgər siz hal-hazırda hər hansı reseptlə və ya reseptsiz dərmanlardan istifadə edirsinizsə və ya bu yaxınlarda istifadə etmisinizsə, lütfən, bu barədə həkiminizə və ya əczaçınıza məlumat verin.

Hamiləlik və laktasiya dövründə istifadəsi
Preparat hamiləlik dövründə istifadə edilməməlidir.

Müalicə zamanı hamilə olduğunuzu hiss etsəniz, dərhal həkiminizlə məsləhətləşin.

Laktasiya
Psevdoefedrin ana südü ilə xaric olduğundan, laktasiya zamanı istifadə etmək tövsiyə edilmir.

Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Preparat başgicəllənmə hissi yarada biləcəyi üçün nəqliyyat vasitəsini və digər potensial təhlükəli mexanizmləri idarə etmək məsləhət görülmür.

İstifadə qaydası və dozası
Böyüklər və 12 yaşdan yuxarı uşaqlar üçün daxilə başlanğıc doza 2 tablet təşkil edir. Lazım olduqda hər 4 saatda bir az su ilə birlikdə 1-2 tablet istifadə edilməlidir.

Həkim tərəfindən tövsiyə edilmədiyi təqdirdə gündə 6 tabletdən çox qəbul edilməməlidir.

Qəbul qaydası:
Tableti bir stəkan su ilə daxilə qəbul edilir.

Fərqli yaş qrupları:

Uşaqlarda istifadəsi:
Preparat 12 yaşdan kiçik uşaqlar üçün istifadə edilməməlidir.
Böyüklər üçün doza 12 yaşdan yuxarı uşaqlar üçün təyin edilir.

Yaşlılarda istifadəsi:
Yaşlı xəstələr üçün böyüklərin dozası təyin edilir.
60 yaşdan yuxarı xəstələrə ehtiyatla istifadə edilməlidir.

İstifadəsinə xüsusi göstərişlər:
Böyrək / qaraciyər çatışmazlığı:

Kəskin böyrək və/və ya qaraciyər çatışmazlığı olan xəstələrdə preparatın istifadəsindən qaçınmaq lazımdır və ya zəruri hallarda həkim nəzarəti altında daha aşağı dozalarda istifadə edilməlidir. 

Əgər siz  tövsiyə olunandan yüksək doza qəbul etmisinizsə, lütfən, həkiminizlə və ya əczaçı ilə əlaqə saxlayın.

Buraxılmış dozanın əvəzinə ikiqat doza qəbul etməyin.

Əlavə təsirləri
Bütün dərmanlar kimi, PSEVDORİN də tərkibindəki maddələrə həssas olan bəzi xəstələrdə yan təsirlərə səbəb ola bilər.

Aşağıdakı ciddi əlavə təsirlərdən hər hansı birini görsəniz, preparatı qəbul etməyi dayandırın və DƏRHAL həkiminizə məlumat verin və ya ən yaxın xəstəxananın təcili yardım şöbəsinə müraciət edin:

• Nəfəs darlığı; üzün, dodaqların, göz qapaqlarının, dilin və boğazın şişməsi: şiddətli qaşınma və dəri səpkisi: qan təzyiqinin aşağı düşməsi səbəbindən ürək döyüntüsünün artması və başgicəllənmə.
• Xırıltı və ya nəfəs almaqda çətinlik (astma tutması).
• Arterial təzyiqin qalxması.
• Aritmiya, taxikardiya, döş qəfəsində ağrı.
• Qarın nahiyəsində şiddətli ağrı (mədə xorası və ya pankreatit).
• Dərinin və gözlərin saralması (qaraciyər funksiyasının pozulması).
• Nəcisdə və ya qusuntuda qanın olması (mədə-bağırsaq qanaxması).
• Dəridə qançırlar, burun və diş ətinin qanaxması, yoluxucu xəstəliklərə tutulma tezliyinin artması, solğunluq və yorğunluq (sümük iliyinin zədələnməsi).
• Dəridə, ağızda, gözdə, cinsiyyət orqanının ətrafında dərinin soyulması, şişməsi, qabarcıqları və qızdırma ilə xarakterizə olunan ağır xəstəlik vəziyyəti (Stivens-Conson sindromu).
• Ağızda və bədənin digər nahiyələrində suluq və ya müxtəlif ölçülü qırmızı səpgi ilə xarakterizə olunan xəstəlik (multiformalı eritema).
• Dərinin soyulması, maye ilə dolu suluqların olması və toxuma itkisi ilə xarakterizə olunan ciddi dəri xəstəliyi (toksik epidermal nekroliz).
• Əzələlərdə ani güc itkisi, hissiyat itkisi, görmə pozğunluqları (insult).
• Şiddətli baş ağrısı, boyun sərtliyi, ürəkbulanma, qusma və çaşqınlıq (aseptik meningit).
• Gerçək olmayan və baş verməyən bir şeyi görmək və eşitmək (hallüsinasiya).

Bütün bunlar çox ciddi əlavə təsirlərdir. Əgər siz bu ciddi əlavə təsirlərdən hər hansı birini görsəniz, sizin bu preparata qarşı allergiyanız var və sizə təcili tibbi yardım və xəstəxanaya yerləşdirmə tələb oluna bilər.

Bu çox ciddi yan təsirlər çox nadir hallarda baş verir.

Əlavə təsirlərin  tezliyi  aşağıdakı parametrlərlə  təyin  edilir:

çox tez-tez (≥ 1/10); tez-tez (≥ 1/100 - < 1/10); bəzən (≥ 1/1000 - < 1/100);  nadir hallarda 

(≥ 1/10000 - < 1/1000); çox nadir  hallarda (< 1/10000); məlum  deyil (əldə  olan məlumatlar  görə  tezliyi qiymətləndirmək  mümkün  deyil).

Tez-tez:

• Əsəbilik
• Yuxusuzluq
• Başgicəllənmə
• Yuxululuq
• Ağızda quruluq
• Ürəkbulanma
• Qusma

Bəzən:

• Anemiya
• Ürtikər
• Qaşınma
• Qızartı
• Üzdə səpgi
• Yorğunluq
• Təlaş
• Narahatlıq
• Baş ağrısı
• Ayaqlarda ödem
• Qarında, mədədə ağrı və meteorizm
• Dispepsiya
• Sidiyəgetmə zamanı yanğı
• Sidik ifrazının pozulması

Nadir:

• Gerçək olmayan və baş verməyən bir şeyi görmək və eşitmək (hallüsinasiya)
• Şəxsiyyət pozğunluğu
• Arterial təzyiqin qalxması
• Ürək döyüntülərinin artması
• Ürək çatışmazlığı
• Döş qəfəsində ağrı
• Nəfəs darlığı
• İshal və ya qəbizlik
• Meteorizm
• Dəri qaşınması
• Allergik dermatit (ekzema)
• Aritmiya

Çox nadir:

• Dəridə qanla dolu qabarcıqların olması, qanaxma
• Qan hüceyrələrinin sayının azalması (gözün və dərinin rənginin dəyişməsi və ya saralması, hərarətin yüksəlməsi, boğaz ağrısı, ağızda yüngül yara, halsızlıq, qripə bənzər əlamətlər, burun qanaması və ya dəridə qanaxma)
• Meningit (boyun əzələlərinin rigidliyi, baş ağrısı, ürəkbulanma, qusma, qızdırma, fotohəssaslıq və ya oriyentasiya itkisi (yer, zaman, məkan qavrayışı))
• Görmə qüsuru
• Qulaqlarda küy
• Başgicəllənmə
• Mədə xorası, perforasiya
• İltihabi bağırsaq xəstəliyi
• Qanlı qusma
• Hepatit, sarılıq
• Nəfəs darlığı, astma, Bronxokonstriksiya
• Xırıltı
• Ağızda xora
• Dəridə və göz ətrafında qanla dolu qabarcıqların olması, şişlik və qızartı ilə xarakterizə olunan iltihab (Stivens-Conson sindromu)
• Böyrək çatışmazlığı 
• Hematuriya
• Ödem

Naməlum:

• Əsəbilik, narahatlıq
• Qıcıqlanma (stimulyatorlara qarşı yüksək həssaslıq)

Doza həddinin aşılması
Preparatın yüksək dozada qəbulu qusma, mədə ağrısı, ishal, qulaqlarda küy, şiddətli yuxululuq, həyəcan, tərləmə, qanlı öskürək, zəif və ya səthi nəfəs, huşunu itirmə və ya qıcolmalara səbəb ola bilər.

Buraxılış forması
10 tablet blisterdə. 2 blister içlik vərəqi ilə birlikdə karton qutuya qablaşdırılır.

Saxlanma şəraiti
25ºС  temperaturdan  yüksək olmayan, işıqdan  qorumaqla  və uşaqların əli çatmayan yerdə saxlamaq lazımdır.

Yararlılıq müddəti
Yararlılıq müddəti qablaşdırmanın üzərində göstərilmişdir. Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı
DROGSAN İlaçları Sanayi ve Ticaret A.Ş.
Esenboğa Merkez Mah. Çubuk Cad. No: 31, Çubuk, Ankara / Türkiye

Məhsulun və əmtəə nişanının sahibi / Qeydiyyat vəsiqəsinin sahibi
Prudens Pharma LP, Scotland.
Office 7, Centrum offices, 38 Queen street, Glasgow, Scotland, G1 3 DX.