Dodemin

Dərman vasitəsinin istifadəsi üzrə təlimat (xəstələr üçün)

DODEMİN 20 mq/20 mq örtüklü tabletlər
DODEMIN

Beynəlxalq patentləşdirilməmiş adı: Lercanidipine+ Enalapril

Tərkibi
Təsiredici maddə:   1 tabletin tərkibində 15,29 mq enalaprilə ekvivalent 20 mq enalapril maleat, 18,88 mq lerkanidipinə ekvivalent 20 mq lerkanidipin hidroxlorid vardır.
Köməkçi maddələr: laktoza monohidrat (200 mesh inək südündən əldə edilib), mikrokristallik sellüloza, natrium nişasta qlikolyat (Tip A), povidon (K30), natrium hidrokarbonat, maqnezium stearat, hipromelloza 5cP, titan dioksid (E171), talk, makroqol 6000, sarı dəmir oksidi  (E172), qırmızı dəmir oksidi (E172). 

Təsviri 
Narıncı iki tərəfi qabarıq, üzəri örtüklə örtülmüş dairəvi tabletlərdir.

Farmakoterapevtik qrupu
AÇF inhibitoru ilə Ca2+ kanallarının blokatorunun kombinasiyası.

ATC kodu: C09BB02.

Farmakoloji xüsusiyyətləri

Farmakodinamikası 
Preparat qan təzyiqini aşağı salan  angiotenzinçevirici fermentin (AÇF) inhibitoru olan enalapril və kalsium kanallarının blokatoru olan lerkanidipinin kombinasiyasından ibarətdir.

Lerkanidipin
Dihidropiridin törəməsi olan lerkanidipin, kalsiumun ürək hüceyrələrinə və saya əzələ hüceyrələrinə transmembran axınının qarşısını alır. Antihipertenziv təsir mexanizmi damarların saya əzələlərinə birbaşa relaksasiyaedici təsir göstərir, nəticədə ümumi periferik damar müqavimətinin azalması ilə nəticələnir. Uzun müddətli antihipertenziv təsir göstərir. Damarların saya əzələ hüceyrələri üçün yüksək seçiciliyinə görə mənfi inotrop təsiri yoxdur.

Enalapril
Enalapril AÇF inhibitorudur, angiotenzin II-nin əmələ gəlməsinin qarşısını alır və onun vazokonstriktor təsirini aradan qaldırır. Ürək yığılmalarının sayının və ürəyin dəqiqəlik həcminin artmasına səbəb olmadan qan təzyiqini azaldır. Ümumi periferik damar müqavimətini azaldır, ürəyin yükünü azaldır. Sağ qulaqcıqda və kiçik qan dövranında təzyiqi azaldır.

Qlükoza, lipoproteinlərin mübadiləsinə və ya reproduktiv sistemin funksiyalarına təsir göstərmir.

Farmakokinetikası
Enalapril və lerkanidipinin eyni vaxtda istifadəsi zamanı farmakokinetik qarşılıqlı təsir müşahidə edilmir.

Lerkanidipin
Oral qəbul edildikdən sonra lerkanidipin mədə-bağırsaq traktından tamamilə sorulur. Yeməkdən sonra qəbul edildikdə mütləq biomənimsənilməsi təxminən 10% təşkil edir; acqarına qəbul edildikdə biomənimsənilməsi ⅓-ə qədər azalır. Preparat yağlı yeməkdən sonra 2 saatdan gec olmayaraq qəbul edilərsə, lerkanidipinin biomənimsənilməsi 4 dəfə artır. Buna görə də, dərman yeməkdən ən azı 15 dəqiqə əvvəl qəbul edilməlidir. Qan plazmasında lerkanidipinin Cmax-ı 1,5-3 saatdan sonra müşahidə olunur. Təkrar qəbul zamanı kumulyasiya vermir. Lerkanidipinin terapevtik təsirinin müddəti 24 saatdır.

Oral qəbul edildikdə qan plazmasında lerkanidipinin konsentrasiyası dozaya birbaşa mütənasib deyil (qeyri-xətti asılılıq). 10, 20 və ya 40 mq qəbul edərkən, qan plazmasında lerkanidipinin Cmax müvafiq olaraq 1:3:8 nisbətində, konsentrasiya əyrisi altında olan sahə isə 1:4:18 nisbətində müəyyən edilmişdir. Lerkanidipinin qan plazmasından toxuma və orqanlara paylanması tez və intensiv şəkildə baş verir. Lerkanidipinin plazma zülalları ilə birləşməsi 98% təşkil edir. Böyrək və qaraciyər çatışmazlığı olan xəstələrdə plazma zülallarının səviyyəsi azalır, buna görə də lerkanidipinin sərbəst fraksiyası arta bilər.

Lerkanidipin qaraciyərin CYP3A4 izoenzimi tərəfindən aktiv olmayan metabolitlər əmələ gətirmək üçün metabolizə olunur.

Qəbul olunan lerkanidipinin dozasının təxminən 50%-i böyrəklər tərəfindən xaric olunur; lerkanidipinin yarımxaricolma dövrü 8-10 saatdır. Ağır böyrək çatışmazlığı olan xəstələrdə və ya hemodializdə olan xəstələrdə lerkanidipin daha yüksək miqdarda (təxminən 70%) böyrəklər vasitəsilə xaric edilir.

Enalapril
Oral qəbul edildikdən sonra enalaprilin biomənimsənilməsi təxminən 60% təşkil edir. Qan plazmasında enalapril Cmax 1 saatdan sonra çatır. Yemək absorbsiyaya təsir göstərmir.

Oral qəbul edildikdə, angiotenzin çevirici fermentə inhibəedici təsir göstərən aktiv enalaprilata çevrilir. Qan zərdabında enalaprilatın Cmax dərman qəbulundan 3-4 saat sonra müşahidə olunur. Enalaprilin plazma zülalları ilə birləşməsi 60%-dən çox deyil. Enalaprilat şəklində olan enalaprilin təxminən 40%-i və dəyişməmiş enalaprilin təxminən 20%-i böyrəklər vasitəsilə xaric olunur. Böyrək çatışmazlığı olan xəstələrdə enalapril və enalaprilatın təsir müddəti artır.

Yüngül və ya orta dərəcəli böyrək çatışmazlığı olan xəstələrdə (kreatinin klirensi – 40-60 ml/dəq) gündə 1 dəfə 5 mq enalapril qəbul edərkən enalaprilat əyrisi altında konsentrasiya sahəsinin plato mərhələsi normal qaraciyər funksiyası olan xəstələrlə müqayisədə iki dəfə artır. Ağır böyrək çatışmazlığı olan xəstələrdə (kreatinin klirensi ≤ 30 ml/dəq) əyri altında konsentrasiya sahəsi təxminən 8 dəfə artır. Böyrək çatışmazlığının bu mərhələsində enalaprilatın yarımxaricolma dövrü artır və əyri altındakı konsentrasiya sahəsinin plato mərhələsinə çatma vaxtı yavaşlayır. Enalaprilat hemodializ vasitəsilə ümumi dövriyyədən çıxarıla bilər. Dializ klirensi 62 ml/dəq.

İstifadəsinə göstərişlər
Arterial təzyiqi tək enalapril və ya lerkanidipin tərəfindən adekvat şəkildə idarə olunmayan xəstələrdə yüksək qan təzyiqinin (hipertoniya) müalicəsi üçün istifadə olunur.

Əks göstərişlər
Əgər preparatın tərkibindəki aktiv maddələrdən hər hansı birinə (enalapril maleat və ya lerkanidipin hidroxlorid) və ya hər hansı digər komponentlərə qarşı allergiyanız (yüksək həssaslığınız) varsa.

• AÇF inhibitorlarının qəbulu, həmçinin, səbəbi bilinməyən və ya genetik olan bir dərman qəbul etdikdən sonra üz, dodaqlar, ağız, dil və ya boğazınızda udmaq və ya nəfəs almağı çətinləşdirən şişkinlik yaranarsa (angioödem).
• Əgər siz uzunmüddətli ürək çatışmazlığının müalicəsi üçün istifadə edilən sakubitril/valsartan istifadə etmisinizsə və ya hazırda qəbul edirsinizsə, angioödem (üzdə, boğazda şişkinlik) riskinin artması ola bilər.
• Əgər sizdə şəkərli diabet, böyrək funksiyasının pozulması varsa və təzyiqi aşağı salmaq üçün tərkibində aliskiren olan dərman qəbul edirsinizsə.
• Hamiləlik zamanı

Aşağıdakı ürək xəstəliklərindən hər hansı biri varsa:

• Ürəkdən çıxan qan damarlarının tıxandığı vəziyyətlər
• Müalicə olunmamış ürək çatışmazlığı
• Qeyri-sabit stenokardiya (sakitlik zamanı və ya döş qəfəsində narahatlıqların artması)
• Miokard infarktından sonra bir ay ərzində

Ağır qaraciyər çatışmazlığı varsa
Ağır böyrək çatışmazlığı varsa və ya dializdəsinizsə

Əgər qaraciyər metabolizminə mənfi təsir göstərən dərmanlar qəbul edirsinizsə, məsələn:

• Antifungal dərmanlar ( məsələn, ketokonazol, itrakonazol)
• Makrolid antibiotikləri (məsələn, eritromisin, troleandomisin, klaritromisin)
• Antiviral dərmanlar (məsələn, ritonavir)

Əgər siz eyni vaxtda siklosporin preparatını istifadə edirsinizsə (transplantasiyadan sonra orqan rədd edilməsinin qarşısını almaq üçün istifadə olunur)

Bu preparatı qreypfrut və ya qreypfrut şirəsi ilə birlikdə istifadə etməyin.

Xüsusi göstərişlər və ehtiyat tədbirləri

• Qan təzyiqinin aşağı olması
• Bu yaxınlarda qusma və ya ishal keçirmisinizsə
• Əgər duz qəbulunu məhdudlaşdıran pəhriz saxlayırsınızsa
• Ürək xəstəliyiniz varsa
• Beyin qan damarlarında hər hansı problem varsa
• Böyrək xəstəliyiniz varsa (böyrək transplantasiyası daxil olmaqla). Bu, qanda kaliumun səviyyəsinin qalxmasına və ciddi nəticələrə səbəb ola bilər. Həkim enalaprilin dozasını tənzimləməli və ya qanda kalium səviyyəsinə nəzarət etməlidir.
• Qaraciyər xəstəliyiniz varsa
• Əgər qan problemi varsa (məs., leykopeniya, aqranulositoz, trombositopeniya) və ya qırmızı qan hüceyrələrinin sayının azalması (anemiya)
• Əgər kollagenoz damar xəstəliyi varsa (məsələn, sistem qırmızı qurdeşənəyi, revmatoid artrit və ya sklerodermiya), immun sistemini zəiflədən müalicə alırsınızsa, allopurinol, prokainamid preparatlarını və ya bu preparatların hər hansı kombinasiyasını qəbul edirsinizsə.
• Qaradərili xəstələrdə AÇF inhibitorlarından istifadə edərkən diqqətli olmalısınız, çünki qaradərili insanlarda üz, dodaqlar, dil və ya boğazın şişməsi ilə nəfəs almağı və ya udqunmanı çətinləşdirə bilən allergik reaksiya riski artır.
• Şəkərli diabet xəstələrində, xüsusilə müalicənin ilk ayında, qandakı şəkərin səviyyəsinin aşağı düşməməsi üçün qan dəyərləri izlənməlidir. Qanda kalium səviyyəsi də normaldan yüksək ola bilər.
• Əgər siz kalium əlavələri, tərkibində kalium saxlayan preparatlar və ya tərkibində kalium olan duz əvəzediciləri qəbul edirsinizsə,
• Əgər 70 yaşdan yuxarısınızsa
• Əgər laktozaya qarşı dözümsüzlük varsa 
• Aşağıdakı dərmanları qəbul edirsinizsə, angioödem riski arta bilər:
  • Rasekadotril (ishalın müalicəsində istifadə olunan dərman);
  • Xərçəngin müalicəsi üçün istifadə olunan dərmanlar (məsələn, temsirolimus, sirolimus, everolimus) və orqan transplantasiyasından sonra orqan rədd edilməsinin qarşısını almaq üçün istifadə olunan dərmanlar
  • Vildaqliptin, diabetin müalicəsində istifadə edilən dərman
• Yüksək qan təzyiqini azaltmaq üçün aşağıdakı dərmanlardan hər hansı birini qəbul edirsinizsə:
  • Angiotenzin II reseptorlarının blokatoru (ARB) (həmçinin "sartanlar", məsələn, valsartan, telmisartan, irbesartan), xüsusən də diabetlə əlaqəli böyrək problemləriniz varsa
  • Aliskiren

Digər dərman vasitələri ilə qarşılıqlı təsiri 
Aşağıdakı dərmanlardan hər hansı birini qəbul edirsinizsə, həkiminizə və ya əczaçınıza bildirin:

• Qan təzyiqini aşağı salan digər dərmanlar
• Kalium əlavələri (duz əvəzediciləri daxil olmaqla), kalium qoruyucu diuretiklər və qandakı kaliumun miqdarını artıra bilən digər dərmanlar (məsələn, bakterial infeksiyaların müalicəsində istifadə edilən trimetoprim və ko-trimoksazol, orqan transplantasiyasından sonra rədd edilməsinin qarşısını almaq üçün istifadə edilən immunosupressiv dərman siklosporin, laxtalanmanın qarşısının alınması üçün qan durulaşdırıcı dərman olan heparin)
• Litium (bəzi depressiya növlərini müalicə etmək üçün istifadə olunan preparat)
• Depressiyanın müalicəsində istifadə edilən “trisiklik antidepressantlar” 
• Psixi problemlərin müalicəsində istifadə edilən “antipsixotiklər”
• Qeyri-steroid iltihabəleyhinə preparatlar, o cümlədən SOG-2 inhibitorları
• Artritin müalicəsində istifadə olunan bəzi ağrıkəsicilər, o cümlədən qızıl ilə terapiya
• Tərkibində “simpatomimetik dərman” adlanan maddələr olan bəzi öskürək və soyuqdəymə dərmanları və arıqlama dərmanları
• Şəkərli diabetin müalicəsində istifadə olunan dərmanlar (o cümlədən oral antidiabetik dərmanlar və insulin)
• Astemizol və ya terfenadin (allergiya dərmanı)
• Amiodaron, xinidin və ya sotalol (ürək döyüntüsünü müalicə etmək üçün istifadə olunan dərmanlar)
• Fenitoin, fenobarbital və ya karbamazepin (epilepsiyanın müalicəsində istifadə olunan dərmanlar)
• Rifampisin (vərəmin müalicəsində istifadə olunan dərman)
• Diqoksin (ürək problemlərini müalicə etmək üçün istifadə olunan dərman)
• Midazolam (yuxugətirici dərman)
• Beta-blokatorlar, məs., metoprolol (arterial təzyiq, ürək çatışmazlığı və tezləşmiş ürək ritmini müalicə etmək üçün istifadə olunan dərman)
• Gündə 800 mq-dan çox dozada istifadə edilən simetidin.

Xroniki ürək çatışmazlığının bir növünün müalicəsində istifadə olunan sakubitril/valsartan preparatından istifadə etdikdə bu preparatı istifadə etməyin, çünki angioödem riski arta bilər.

Aşağıdakı dərmanları qəbul edirsinizsə, angioödem riski arta bilər:

• Rasekadotril, ishalın müalicəsində istifadə edilən dərman,
• Xərçəngin müalicəsində (məsələn, temsirolimus, sirolimus, everolimus) və orqan transplantasiyasından sonra orqan rəddinin qarşısını almaq üçün istifadə olunan dərmanlar
• Vildaqliptin, şəkərli diabetin müalicəsində istifadə edilən dərman.

Əgər siz hal-hazırda reseptlə və ya reseptsiz hər hansı dərmandan istifadə edirsinizsə və ya bu yaxınlarda istifadə etmisinizsə, lütfən, bu barədə həkiminizə və ya əczaçınıza məlumat verin.

Hamiləlik və laktasiya dövründə istifadəsi
Əgər hamilə olduğunuzu (və ya ola biləcəyinizi) düşünürsünüzsə, həkiminizə məlumat verin. Həkiminiz adətən hamilə qalmazdan əvvəl və ya hamilə olduğunuzu bilən kimi dərman qəbul etməyi dayandırmağı və əvəzinə başqa dərman istifadə etməyi tövsiyə edəcək. Hamiləlik dövründə preparatın istifadəsi tövsiyə edilmir. Hamiləlik zamanı bu preparatın istifadəsi körpəyə ciddi zərər verə bilər. Müalicə zamanı hamilə olduğunuzu başa düşsəniz, dərhal həkiminizə və ya əczaçıya müraciət edin.

Laktasiya
Preparat laktasiya zamanı istifadə edilməməlidir.

Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Preparatla müalicə zamanı yuxululuq, zəiflik və ya başgicəllənmə baş verərsə, maşın sürməyin və potensial təhlükəli mexanizmləri idarə etməyin.

İstifadə qaydası və dozası
Həkim tərəfindən başqa cür göstəriş olmadıqda, tövsiyə olunan doza gündə 1 tabletdir, hər gün eyni vaxtda qəbul edilir.

İstifadə qaydası
Tablet adətən səhər yeməyindən ən azı 15 dəqiqə əvvəl qəbul edilməlidir. Tabletlər bütöv olaraq su ilə udulmalıdır.

Fərqli yaş qrupları

• Uşaqlarda istifadəsi: preparatın 18 yaşdan kiçik uşaqlar və yeniyetmələrdə effektivliyi və təhlükəsizliyi məlum deyil. Bu xəstə qrupunda istifadə edilməməlidir.
• Yaşlılarda istifadəsi: Doza xəstənin böyrək funksiyasından asılıdır. Həkim vəziyyəti qiymətləndirəcək və uyğun istifadəni təyin edəcək.

Xüsusi hallar
Böyrək çatışmazlığı/qaraciyər çatışmazlığı: Böyrək və qaraciyər çatışmazlığı olan xəstələrdə doza korreksiya olunmalıdır. Ağır qaraciyər və böyrək funksiyası pozulmuş xəstələrdə istifadə edilməməlidir.

Əlavə təsirləri
Bütün dərmanlar kimi, bu preparat da tərkibindəki maddələrə həssas olan insanlarda yan təsirlərə səbəb ola bilər.

Aşağıdakılardan hər hansı biri baş verərsə, bu preparatdan istifadə etməyi dayandırın və DƏRHAL həkiminizə məlumat verin və ya ən yaxın xəstəxananın təcili yardım şöbəsinə müraciət edin:

• Nəfəs alma və udma çətinliyinə səbəb ola bilən üz, dodaqlar, dil və ya boğazın şişməsi ilə müşayiət olunan allergik reaksiya;

Bütün bunlar çox ciddi yan təsirlərdir.

Əgər bunlardan hər hansı biri sizdə varsa, sizin bu preparata qarşı ciddi allergiyanız var. Təcili tibbi yardıma və ya xəstəxanaya yerləşdirilməyə ehtiyacınız ola bilər.

Bunlar ciddi yan təsirlərdir və çox nadirdir.

Preparatdan istifadə etməyə başladıqdan sonra başgicəllənmə, huşunu itirmə və ya bulanıq görmə hiss edə bilərsiniz; Bu, qan təzyiqinin qəfil düşməsi ilə əlaqədardır. Bunlardan hər hansı biri baş verərsə, uzanmaq lazımdır və həkimlə məsləhətləşmək lazımdır.

Əlavə  təsirlərin tezliyi aşağıdakı parametrlərlə təyin edilir:

Çox tez-tez: ən azı 10 xəstədən 1-də baş verə bilər.

Tez-tez: 10 xəstədən 1-dən az, lakin 100 xəstədən 1-dən çox

Bəzən: 100 xəstədən 1-dən az, lakin 1000 xəstədən 1-dən çox .

Nadir: 1000 xəstədən 1-dən az, lakin 10.000 xəstədən 1-dən çox.

Çox nadir: 10.000 xəstədən 1-dən az.

Məlum deyil: mövcud məlumatlar əsasında təxmin edilə bilməz.

Çox tez-tez

• Öskürək.
• Başgicəllənmə, baş ağrısı.

Bəzən

• Bəzi qan dəyərlərində dəyişikliklər, məsələn, qanda trombositlərin sayının azalması.
• Qanda kalium səviyyəsinin artması.
• Əsəbilik (narahatlıq).
• Ayağa qalxarkən başgicəllənmə hissi.
• Sürətli və ya nizamsız ürək döyüntüsü.
• Üz, boyun və yuxarı döş qəfəsinin qəfil qızarması, qan təzyiqinin düşməsi.
• Qarın ağrısı, qəbizlik, ürəkbulanma.
• Qaraciyər fermentlərinin səviyyəsinin artması.
• Dəridə qızartı.
• Oynaq ağrıları.
• Sidiyə getmə tezliyinin artması.
• Zəiflik, yorğunluq, isti basmalar, ayaq biləyinin şişməsi.

Nadir

• Anemiya.
• Allergik reaksiyalar.
• Qulaqlarda küy.
• Bayılma.
• Boğazda quruluq, boğaz ağrısı.
• Həzm pozğunluğu, dildə duzlu dad, ishal, ağızda quruluq, diş ətinin şişməsi.
• Üzün, dilin, dodaqların və ya boğazın şişməsi səbəbindən udma və nəfəs almaqda çətinlik yaradan allergik reaksiya, dəri səpgiləri, məxmərək.
• Gecə sidiyə çıxma, sidiyin miqdarının artması.
• İmpotensiya.

Enalapril və ya lerkanidipinlə monoterapiya zamanı əlavə yan təsirlər müşahidə edilmişdir.

Enalapril
Çox tez-tez
Bulanıq görmə, başgicəllənmə, zəiflik və ya ürəkbulanma, öskürək.

Çox tez-tez
Depressiya, baş ağrısı, huşun itməsi, sinədə göynəmə, qan təzyiqinin aşağı düşməsi səbəbindən başgicəllənmə, ürək ritmindəki dəyişikliklər, taxikardiya, stenokardiya, nəfəs darlığı, dadın dəyişməsi, qanda kreatinin səviyyəsinin artması (adətən analizlə müəyyən edilir), qanda kalium səviyyəsinin artması, ishal, qarın ağrısı, yorğunluq, səpgi, üzün, dilin, dodaqların və ya boğazın şişməsi səbəbindən udma və tənəffüs çətinliyi.

Bəzən
Anemiya (o cümlədən aplastik və hemolitik növləri), qan təzyiqinin qəfil azalması, çaşqınlıq, əsəbilik, yuxusuzluq və ya yuxululuq, dəridə qarışqa yerimə hissi və ya uyuşması, infarkt (beyin və ya ürəkdə qan axını problemləri olan xəstələr də daxil olmaqla) ola bilər, yüksək riskli xəstələrdə qan təzyiqinin çox aşağı düşməsi səbəbiylə ola bilər), insult (yüksək riskli xəstələrdə çox aşağı qan təzyiqi səbəbiylə ola bilər), burun axması, boğaz ağrısı və səsin batması, astma ilə əlaqədar döş qəfəsində sıxılma, qidanın bağırsaqlarda yavaş hərəkəti, pankreatit, ürəkbulanma (qusma), həzm pozğunluğu, qəbizlik, mədənin qıcıqlanması, ağızda quruluq, xoralar, iştahasızlıq, qaşınma və ya övrə, saç tökülməsi, böyrək funksiyasının pozulması, böyrək çatışmazlığı, tərləmənin artması, sidikdə zülal səviyyəsinin artması (sınaqla ölçülür), əzələ qıcolmaları, xəstəlik hissi, qızdırma, qanda şəkərin aşağı düşməsi, natrium səviyyəsinin aşağı düşməsi, qanda sidik cövhərinin səviyyəsinin artması (hamısı qan testi ilə ölçülür), dəridə qızartı, sürətli və ya nizamsız ürək döyüntüsü, vertiqo (başgicəllənmə hissi), qulaqlarda küy, impotensiya.

Nadir
Ağ qan hüceyrələrinin sayının azalması, sümük iliyinin depressiyası (sümük iliyinin funksiyasının azalması), autoimmun xəstəliklər, yuxu pozğunluğu, yavaş qan axını səbəbindən əllərin və ayaqların soyuması və ağarması (Reyno xəstəliyi), burun iltihabı, pnevmoniya, qaraciyər funksiyasının azalması kimi qaraciyər problemləri, qaraciyərin iltihabı, sarılıq (dəri və gözlərin saralması), qaraciyər fermentinin və ya bilirubinin səviyyəsinin artması (qan testi ilə ölçülür), multiform eritema ( dəridə müxtəlif formalı qırmızı ləkələr), Stivens-Conson sindromu və toksik epidermal nekroliz (qızartı, soyulma, ağrı, dərinin qabarması ilə müşayiət olunan ağır dəri xəstəliyi), eksfoliativ dermatit/eritrodermiya (dərinin qaşınması və ya soyulması ilə şiddətli dəri səpgisi) , dəridə suluqlar (dəridə maye ilə dolu kiçik qabarıqlar), sidik ifrazının azalması, kişilərdə süd vəzilərinin böyüməsi (ginekomastiya), boyun, qoltuqaltı və ya qasıqda vəzilərin şişməsi, ağciyərlərdə maye və ya digər maddələrin yığılması, yanaqların, diş ətlərinin, dilin, dodaqların, boğazın iltihabı.

Çox nadir
Bağırsaqda ödem (bağırsaqlarda angionevrotik ödem).

Naməlum
Antidiuretik hormonun həddindən artıq istehsalı mayenin orqanizmdə ləngiməsinə o da öz növbəsində  zəiflik, yorğunluq və ya huşun dumanlanmasına səbəb olur.

Aşağıda qeyd olunan bəzi simptomlar kompleksi rast gəlinə bilər: qızdırma, qan damarlarının iltihabı (vaskulit), əzələ ağrısı (mialgiya/miozit), oynaq ağrısı (artralgiya/artrit). Səpgi, dərinin işığa qarşı həssaslığı və ya digər dəri təzahürləri baş verə bilər.

Lerkanidipin
Bəzi yan təsirlər ciddi ola bilər.

Aşağıdakılardan hər hansı biri baş verərsə, dərhal həkiminizə məlumat verin və ya ən yaxın xəstəxananın təcili yardım şöbəsinə müraciət edin:

Nadir
Stenokardiya, allergik reaksiyalar (simptomları qaşınma, səpgi, övrə), huşunu itirmə.

Əvvəllər stenokardiyası olan xəstələrdə lerkanidipinin qəbulu ilə tutmaların tezliyi, müddəti və ya şiddəti arta bilər. Ayrı-ayrı hallarda infarkt halları müşahidə oluna bilər.

Digər əlavə təsirlər
Ümumi
Baş ağrısı, ürək döyüntüsünün artması, aritmiya və taxikardiya, üzün, boyunun və ya sinənin yuxarı hissəsinin qəfil qızarması (qızartma), ayaq biləyinin şişməsi.

Bəzən
Başgicəllənmə, qan təzyiqinin düşməsi, ürəkdə yanğı hissi, xəstəlik hissi, mədə ağrısı, dəri səpgiləri, qaşınma, əzələ ağrısı, çox miqdarda sidik ifrazı, zəiflik və ya yorğunluq hissi.

Nadir
Yuxululuq, qusma, ishal, səpgi, sidiyə getmə sayının artması, sinədə ağrı.

Naməlum
Diş ətinin şişməsi, qaraciyər funksiyasında dəyişikliklər (qan testləri ilə müəyyən edilir), bulanıq maye (qarın boşluğuna boru vasitəsilə dializ apararkən), tənəffüs və ya udma çətinliyinə səbəb ola biləcək üz, dodaq, dil və ya boğazın şişməsi.

Bu içlik vərəqədə qeyd olunmayan hər hansı əlavə təsirləri müşahidə etsəniz, lütfən, həkiminizə və ya əczaçınıza məlumat verin.

Əlavə təsirlər barədə məlumatın verilməsi
Əgər siz bu vərəqədə qeyd olunan və ya qeyd olunmayan hər hansı əlavə təsirlərlə rastlaşsanız, bu haqda həkiminiz və ya əczaçınızla danışın. 

Doza həddinin aşılması
Təyin olunmuş dozanı aşmayın. Həkiminizin təyin etdiyi dozadan artıq istifadə etmisinizsə, dərhal həkiminizlə məsləhətləşin və ya xəstəxanaya müraciət edin; Dərmanın qablaşdırmasını özünüzlə aparın.

Doza həddinin aşılması arterial təzyiqin çox aşağı düşməsinə və aritmiya və ya taxikardiyaya səbəb ola bilər.

Əgər tableti qəbul etməyi unutsanız, buraxılmış dozanı atlayın. Sonra adi vaxtda tabletləri qəbul etməyə davam edin.

Unudulmuş dozaları kompensasiya etmək üçün ikiqat doza qəbul etməyin.

Buraxılış forması
15 tablet blisterdə. 2 blister içlik vərəqi ilə birlikdə karton qutuya qablaşdırılır.

Saxlanma şəraiti
25ºС temperaturdan yüksək olmayan, işıqdan qorumaqla və uşaqların əli çatmayan yerdə saxlamaq lazımdır.

Yararlılıq müddəti
2 il.
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı/Qeydiyyat vəsiqəsinin sahibi
Recordati İlaç San. ve Tic. A.Ş.
Çerkezköy Organize Sanayi Bölgesi, Karaağaç Mah. Atatürk Cad. No: 36 Kapaklı/Tekirdağ/TURKEY.

Məhsulun və əmtəə nişanının sahibi
Prudens Pharma LP, Scotland.
Office 7, Centrum offices, 38 Queen street, Glasgow, Scotland, G1 3 DX.