Dərman vasitəsinin istifadəsi üzrə təlimat (xəstələr üçün)

OPERAZON  1500 mq inyeksiya məhlulu hazırlamaq üçün toz
OPERAZON

Beynəlxalq patentləşdirilməmiş adı: Cefoperazone+Sulbactam
Təsiredici maddə: 1 flakonda 1000 mq sterilizə olunmuş sefoperazon natrium və 500 mq sterilizə olunmuş sulbaktam natrium  
Həlledici: inyeksiya üçün su.

Təsviri
İnyeksiya məhlulu üçün ağ rəngli tozdur.
Həlledici: şəffaf, rəngsiz məhluldur.

Farmakoterapevtik qrupu
Antibakterial.
ATC kodu: J01DD62.

Farmakoloji xüsusiyyətləri
Sulbaktam/sefoperazon antibakterial kombinasiyasındakı Sefoperazon III nəsil sefalosporin olub, hüceyrə divarı mukopeptidinin biosintezini inhibə edərək aktiv çoxalma mərhələsində olan həssas orqanizmlərə qarşı təsirlidir. Sulbaktam Neisseriaceae və Acinetobacter bakteriyalarından başqa digər bakteriyalara antibakterial təsir göstərmir. Hüceyrəsiz bakterial sintezlə aparılan biokimyəvi tədqiqatlarda beta-laktam antibiotiklərinə davamlı orqanizmlər tərəfindən sintez olunan beta-laktamazaların geridönməz inhibitoru olduğu müəyyən edilmişdir. Sulbaktamın penisillinlərə və sefalosporinlərə inhibəedici təsiri rezistent ştammlarla aparılan tədqiqatlarda göstərilmişdir. Bu tədqiqatlarda sulbaktam penisillinlərlə və sefalosporinlərlə birgə istifadə zamanı sinergik təsir göstərmişdir. Sulbaktam eyni zamanda penisillin birləşdirici zülallarla birləşdiyindən, bəzi həssas ştammlar tək sefoperazonla müqayisədə sulbaktam/sefoperazon kombinasiyasına daha həssas olurlar.

Farmakokinetikası
Sulbaktam/sefoperazon orqanizmə yeridildikdən sonra sulbaktamın dozasının təxminən 84%-i və sefoperazonun dozasının 25%-i böyrəklər tərəfindən xaric olunur. Sefoperazonun qalan çox hissəsi isə öd ilə xaric olunur. Sulbaktam/sefoperazonun tətbiqindən sonra sulbaktamın yarım parçalanma müddəti təxminən 1 saat, sefoperazonda isə 1,7 saatdır. Qan plazmasında olan konsentrasiyaları tətbiq olunan doza ilə proporsional olduğu göstərilmişdir. Bu göstəricilər komponentlərin ayrı-ayrılıqda yeridilməsi zamanı qeyd edilən göstəricilərlə uyğundur. 2 q sulbaktam/sefoperazon (1 q sulbaktam, 1 q sefoperazon) venadaxili olaraq 5 dəqiqə müddətində tətbiq edildikdən sonra sulbaktam və sefoperazonun ortalama pik konsentrasiyaları müvafiq olaraq 130,2 və 236,8 mkq/ml təşkil etmişdir. Bu sefoperazon (Vd=10,2 - 11,3 l) ilə qarşılaşdırıldığında sulbaktam (Vd = 18,0 - 27,6 l) üçün daha böyük paylanma həcmini əks etdirir. Əzələdaxili 1,5 q sefoperazon/sulbaktam (0,5 q sulbaktam, 1 q sefoperazon) yeridildikdə sulbaktam və sefoperazonun qanda ən yüksək konsentrasiyaları 15 dəqiqə-2 saat sonra müşahidə edilir. Sulbaktam və sefoperazon üçün qanda ən yüksək konsentrasiya müvafiq olaraq 19,0 və 64,2 mkq/ml-dir. Həm sulbaktam, həm də sefoperazon öd, öd kisəsi, dəri, appendiks, uşaqlıq borusu, yumurtalıq, uşaqlıq və digərləri daxil olmaqla müxtəlif toxuma və mayelərdə yaxşı paylanır. Sulbaktam/sefoperazon birlikdə istifadə edildikdə sulbaktam və sefoperazon arasında hər hansı bir farmakokinetik qarşılıqlı təsirin olduğuna dair məlumat yoxdur. Çox saylı istifadə zamanı sulbaktam/sefoperazon kompleksinin hər iki komponentinin farmakokinetikasında əhəmiyyətli bir dəyişiklik müşahidə edilməmişdir və hər 8-12 saatdan bir istifadə edildikdə kumulyasiya baş verməmişdir.

İstifadəsinə göstərişlər
İnyeksiya üçün 1500 mq Sefoperazon/sulbaktam ona həssas mikroorqanizmlərin səbəb olduğu aşağıda adları qeyd edilən infeksiyalarda istifadə edilir:

• Tənəffüs yollarının infeksiyaları (yuxarı və aşağı)
• Sidikçıxarıcı yolların infeksiyaları (yuxarı və aşağı)
• Peritonit, xolesistit, xolangit və digər qarın boşluğu infeksiyaları
• Sepsis
• Meningit
• Dəri və yumşaq toxuma infeksiyaları
• Sümük və oynaq infeksiyaları
• Kiçik çanaq orqanlarının iltihabi xəstəlikləri, endometrit, qonoreya və digər genital infeksiyalar

Əks göstərişlər
İnyeksiya üçün 1500 mq sefoperazon və sulbaktam penisillinlərə, sulbaktam, sefoperazon və ya sefalosporinlərdən hər hansı birinə qarşı məlum allergiyası olan xəstələrdə əks göstərişdir.

Xüsusi göstərişlər və ehtiyat tədbirləri
Beta-laktam və ya sefalosporinlərlə müalicə alan xəstələrdə ciddi və bəzən ölümcül həssaslıq (anafilaktik) reaksiyalar bildirilmişdir. Bu reaksiyaların anamnezində bir çox alergenə qarşı yüksək həssaslıq göstərən insanlarda başvermə ehtimalı daha yüksəkdir. Allergik reaksiya baş verdikdə dərman qəbulu dayandırılmalı və müvafiq müalicə tətbiq edilməlidir. Ciddi anafilaktik reaksiyalar adrenalinlə təcili müdaxilə tələb edir. Oksigen, venadaxili steroidlər və tənəffüs yollarının keçiriciliyinin təmin olunması, intubasiya daxil olmaqla göstərişə əsasən tətbiq olunmalıdır. Digər antibiotiklərdə olduğu kimi, sefoperazonla müalicə olunan bir neçə xəstədə K vitamini çatışmazlığı meydana gəlmişdir. Çox güman ki, mexanizm normal olaraq bu vitamini sintez edən bağırsaq florasının pozulması ilə əlaqədardır. Risk altında olanlar arasında zəif qidalananlar, malabsorbsiyası olan xəstələr (məsələn, mukovissidoz) və uzun müddət venadaxili qidalanma rejimində olan xəstələr vardır. Bu xəstələrdə, antikoaqulyant terapiya alan xəstələrdə və ekzogen K vitamini alanlarda protrombin vaxtı izlənilməlidir.
Digər antibiotiklərdə olduğu kimi, sefoperazon/sulbaktamın uzun müddətli istifadəsi zamanı həssas olmayan mikrorqanizmlərin həddindən artıq çoxalması baş verə bilər. Müalicə zamanı xəstələr diqqətlə izlənilməlidir. Uzun müddət davam edən terapiya zamanı orqan və sistemlərin disfunksiyasının vaxtaşırı yoxlanılması tövsiyə olunur; bura böyrək, qaraciyər və hematopoetik sistem (qan yaradan orqanlar sistemi) daxildir. Bu, xüsusilə yenidoğulmuş körpələrdə, xüsusən vaxtından əvvəl doğulmuş və digər körpələrdə vacibdir.
Bütün antibakterial preparatlar kimisefoperazon istifadəsi zamanı da Clostridium difficile bakteriyaları ilə əlaqəli ishal yaranması faktı qeyd olunmuşdur, ağırlıq dərəcəsi isə yüngül ishaldan fatal kolitə qədər dəyişə bilər. Antibakterial preparatlarla müalicə yoğun bağırsağın normal mikroflorasını dəyişdirir, bu isə Clostridium difficile bakteriyasının həddindən artıq çoxalmasına səbəb olur. Sefoperazon/sulbaktam körpələrdə effektiv şəkildə istifadə edilmişdir. Yarımçıqdoğulmuş körpələrdə və ya yenidoğulmuşlarda geniş tədqiq olunmamışdır. Bu səbəbdən, yarımçıqdoğulmuş körpələrin və yenidoğulmuş körpələrin müalicəsinə başlamazdan əvvəl  potensial faydalar və mümkün risklər nəzərə alınmalıdır. Sefoperazon plazma zülalları ilə birləşmiş bilirubini ayırmır.

Dərman vasitələri ilə qarşılıqlı təsiri
Sefoperazonun istifadəsi zamanı və hətta sefoperazon tətbiqinin beşinci günündə də alkoqol qəbul  edildikdə qızartı, tərləmə, baş ağrısı və taxikardiya ilə xarakterizə olunan hallar müşahidə edilmişdir. Bəzi digər sefalosporinlərlə də  oxşar reaksiyalar müşahidə edilmişdir və buna görə də, xəstələrə sulbaktam/sefoperazon tətbiqi ilə birlikdə  alkoqollu içkilərin qəbulu barədə xəbərdarlıq edilməlidir. Peroral və ya parenteral yolla süni qidalanmaya ehtiyacı olan xəstələrdə etanol tərkibli məhlulların istifadəsindən  çəkinmək lazımdır.

Hamiləlik və laktasiya dövründə istifadəsi
Heyvanlar üzərində aparılan tədqiqatlarda sefoperazon/sulbaktamın, hamiləliyin inkişafına mənfi  təsiri haqqında məlumat göstərilməyib. Hal-hazırda insanlarda aparılan  müvafiq və nəzarət olunan tədqiqatlar yoxdur.
Sefoperazon/sulbaktam  yalnız ehtiyac yarandıqda hamiləlik zamanı ehtiyatla istifadə oluna bilər. Yalnız az miqdarda sulbaktam və sefoperazon ana südü ilə xaric olur. Hər iki dərman da südverən anaların südündə zəif xaric olmasına baxmayaraq, südverən anada sulbaktam/sefoperazon ehtiyatla istifadə olunmalıdır.

Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Mövcud deyil.

İstifadə qaydası və dozası
Əzələ daxili/venadaxili istifadə edilir.
1500 mq inyeksiya  üçün sefoperazon və sulbaktam tozu həlledicisində həll edilərək birbaşa venaya və ya əzələyə vurulmalıdır. Bəzi hallarda, venadaxili infuziyaya əlavə edilə bilər. Düzgün doza həkiminiz tərəfindən sizin yaşınız və çəkinizə uyğun olaraq  təyin edilməlidir. Ümumiyyətlə 1500 mq inyeksiya üçün sefoperazon və sulbaktam ilə müalicə xəstəliyin sağalmasından və ya əməliyyatdan sonra 2-3 gün ərzində davam etdirilir.
12 yaşdan yuxarı uşaqlar və böyüklər üçün
Sulbaktam:sefoperazon nisbəti 1:1-dir. Dozalar sefoperazon əsasında göstərilir. Yüngül və orta dərəcəli infeksiyalarda gündə 1-2 q, hər 12 saatdan bir bərabər bölünmüş dozalarda istifadə edilir. Ağır infeksiyalarda gündə 4 q-a qədər hər 12 saatdan bir bərabər bölünmüş dozalarda istifadə edilir. Sulbaktamın gündəlik maksimal dozası 4 q-dır.
Körpələr və 12 yaşa qədər uşaqlar
Sulbaktam:sefoperazon nisbəti 1:1-dir. Dozalar sefoperazon əsasında göstərilir. Məsləhət görülən doza 20-40 mq/kq/gün, hər 6-12 saatdan bir bərabər bölünmüş dozalarda istifadə edilir. Ciddi infeksiyalarda 160 mq/kq/gün -ə qədər hər 6-12 saatdan bir 2-4 hissəyə bərabər bölünmüş dozalarda istifadə edilir.
Sulbaktamın maksimal dozası 80 mq/kq/gün-dür.
Böyrək çatışmazlığı olan xəstələr
Dozalanma nəzarətdə saxlanılmalıdır.
Hazırlanması
Venadaxili infuziya üçün hər flakon uyğun miqdarda inyeksiya üçün steril su, fizioloji məhlul, 5%-li dekstroza sulu məhlulu ilə həll edilir və daha sonra eyni həlledici istifadə edilərək 20 ml-yə qədər durulaşdırılmalıdır. Hazır məhlul 15-60 dəqiqə ərzində v/d yeridilməlidir.
Venadaxili inyeksiya üçün isə hər flakon yuxarıdakı kimi hazırlanmalı və minimum 3 dəqiqə ərzində yeridilməlidir.

Əlavə təsirləri
Sulbaktam/sefoperazon ümumiyyətlə  orqanizm tərəfindən yaxşı qəbul olunur. Əksər əlavə təsirlər yüngül və ya orta dərəcədə olur və müalicənin davamı fonunda normal keçirilir. Sulbaktam/sefoperazonun qəbulu zamanı ən çox rast gəlinən əlavə təsirlər mədə-bağırsaq traktında müşahidə olunmuşdur. Digər əlavə təsirlər dermatoloji reaksiyalarla, baş ağrısı, inyeksiya nahiyəsində ağrı, titrətmə və anafilaktik reaksiyalar kimi rast gəlinə bilər.
Təxminən 2500 xəstədəki müqayisəli və müqayisəli olmayan tədqiqatların birləşdirilmiş klinik sınaq məlumatlarında aşağıdakılar müşahidə edilmişdir:
Mədə-bağırsaq traktı
Digər antibiotiklərdə olduğu kimi, sulbaktam/sefoperazon istifadəsi zamanı da ən çox rast gəlinən əlavə təsirlər mədə-bağırsaq traktında olmuşdur, diareya (3,9%), sonra isə ürəkbulanma və qusma (0,6%) halları müşahidə edilmişdir.
Dermatoloji reaksiyalar
Bütün penisillinlər və sefalosporinlərdə olduğu kimi makulopapulyar səpgilər (0,6%) və övrə (0,08%) ilə ortaya çıxan yüksək həssaslıq halları. Bu reaksiyaların, xüsusən anamnezində penisillinə qarşı allergiyası olan xəstələrdə başvermə ehtimalı daha yüksəkdir.
Hematoloji reaksiyalar: Neytrofillərin səviyyəsinin azalması (0,4%) müşahidə edilmişdir. Digər beta-laktam antibiotiklərdə olduğu kimi uzun müddət qəbul edildikdə geridönən neytropeniya (0,5%) baş verə bilər. Bəzi insanlarda müalicə zamanı düz Kumbs testi (5,5%) pozitiv olmuşdur. Hemoqlobin (0,9%) və ya hematokritin azalması (0,9%) bildirilmişdir. Tranzitor eozinofiliya (3,5%), trombositopeniya (0,8%) və hipoprotrombinemiya (3,8%) halları müşahidə olunmuşdur.
Digər
Baş ağrısı (0,04%), qızdırma (0,5%), inyeksiya nahiyəsində ağrı (0,08%) və titrətmə (0,04%) halları müşahidə edilmişdir.
Laborator dəyişikliklər
Qaraciyərin funksional testlərinin keçici yüksəlmələri, AST (5,7%), ALT (6,2%), qələvi fosfataza (2,4%) və bilirubin (1,2%) qeyd edilmişdir.
Yerli reaksiyalar
Sulbaktam/sefoperazon ümumiyyətlə əzələdaxili tətbiqdən sonra yaxşı qəbul edilir. Bəzən müvəqqəti ağrı ola bilər. Digər sefalosporinlər və penisillinlərdə olduğu kimi, sulbaktam/sefoperazon venadaxili kateterlə tətbiq olunduqda, bəzi xəstələrdə inyeksiya yerində flebit (0,1%) yarana bilər.

Doza həddinin aşılması
Sefoperazon natrium və sulbaktam natriumun insan üçün kəskin toksikliyi barədə məhdud məlumatlar mövcuddur. Doza həddinin aşılması zamanı əvvəldə qeyd olunan əlavə təsirlərin təzahürləri  müşahidə oluna bilər. Beta-laktam antibiotiklərinin serebrospinal mayedə yüksək konsentrasiyada toplanması qıcolmalar daxil olmaqla nevroloji simptomlara səbəb ola bilmə faktı nəzərə alınmalıdır. Sefoperazon və sulbaktamın hər ikisi hemodializ yolu ilə orqanizmdən kənarlaşdırıldığı üçün böyrək funksiyası pozulmuş xəstələrdə doza həddinin aşılması hallarında bu prosedurla dərmanın orqanizmdən çıxarılmasını sürətləndirmək mümkündür.

Buraxılış forması
1500 mq toz, boz butil rezin tıxac ilə bağlanılmış və yaşıl alüminium möhür ilə möhürlənmiş 20 ml-lik rəngsiz şüşə flakonda. 10 ml həlledici, şəffaf  FFS ampulda. 1 flakon və 1 ampul həlledici, içlik vərəqə ilə birlikdə karton qutuya qablaşdırılır.
Saxlanma şəraiti
30℃-dən yuxarı olmayan temperaturda, quru, günəş şüası düşməyən və uşaqların əli çatmayan yerdə saxlamaq lazımdır. Dondurmaq olmaz.

Yararlılıq müddəti
2 il
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı
BUENO SALUD (CARE) PVT LTD.
Plot No.K-20/21, Gallops Industrial Park-2,Vill.Vasana Chacharawadi, Tal.Sanand, Ahmedabad-382213
AMANTA HEALTHCARE PVT. LTD
Plot No. 876,, N.H. No. 8, Village - Hariyala, Tal-Matar Dist: Khieda - 387 411. Gujarat State, India.

Qeydiyyat vəsiqəsinin sahibi
OPES HEALTHCARE PVT LTD.
G-203, Shri  Kabir  Enclave, Ghuma, Opp. Homiyopethic College, Bopal Gam Road, Ahmedabad-380058, India.

Məhsulun və əmtəə nişanının sahi̇bi̇:
“PRUDENS PHARMA” LP, Şotlandiya.