Dərman vasitəsinin istifadəsi üzrə təlimat (xəstələr üçün)

SAKURAT inyeksiya üçün məhlul
SAKURAT

Beynəlxalq patentləşdirilməmiş adı: Deksketoprofen
trometamol

Tərkibi
Təsiredici maddə:   1 ml məhlulun tərkibində 25 mq deksketoprofenə uyğun 36,9 mq
deksketoprofen trometamol və ya 2 ml-də 50 mq deksketoprofenə bərabər
(ümumi ampul həcmi) 73,8 mq deksketoprofen trometamol vardır.
Köməkçi maddələr: etanol (% 96), natrium xlorid, natrium hidroksid (pH tənzimlənməsi üçün),
inyeksiya üçün su.
Təsviri
Hər birinin tərkibində 50 mq deksketoprofen (trometamol) olan, demək olar ki, rəngsiz,
şəffaf məhlul, hər biri 2 ml, 6 ampul şəklində.

Farmakoterapevtik qrupu
Qeyri-steroid iltihab əleyhinə preparatlar.

ATC kodu: M01AE17.

Farmakoloji xüsusiyyətləri
Qeyri-steroid iltihab əleyhinə preparatların (QSİƏP) təsir mexanizmi tsiklooksigenaza fermentini inhibə edərək prostaqlandinlərin (PG) sintezini zəiflətməsi ilə əlaqələndirilir. Preparat araxidon turşusunun tsiklik endoperoksidlərə (PGG2 və PGH2) çevrilməsini inhibə edərək PGE1, PGE2, PGF2α və PGD2 prostaqlandinlərin, həmçinin prostasiklin (PGI2) və tromboksanların (TxA2 və TxB2) əmələ gəlməsinin qarşısını alır. PG sintezinin zəifləməsi dolayı yolla kininlər kimi digər iltihab mediatorlarının sintezinə təsir edə bilər.

Farmakodinamika: Deksketoprofen trometamol analgetik, antipiretik və iltihab əleyhinə təsir göstərən QSİƏP-dır.Müxtəlif ağrı növləri üçün aparılan klinik tədqiqatlar deksketoprofen trometamolun yüksək analgetik aktivliyə malik olduğunu göstərmişdir.
Preparatın analgetik təsiri ilk 45 dəqiqə ərzində maksimum həddə çatır və 8 saat öz təsirini saxlamış olur. Klinik tədqiqatlara əsasən deksketoprofen trometamolun istifadəsi əməliyyatdan sonrakı ağrını aradan qaldırmaq üçün opiatların istifadəsini əhəmiyyətli dərəcədə azaldır (əməliyyatdan sonrakı ağrıları aradan qaldırmaq üçün morfin qəbul edən xəstələrə deksketoprofen təyin edildikdə plasebo ilə müqayisədə xeyli az morfin (30-45%) tələb edilirdi).

Farmakokinetikası
Sorulması
Deksketoprofen trometamolun əzələdaxili tətbiqindən sonra qan plazmasındakı maksimal konsentrasiya (Cmax) orta hesabla 20 dəqiqədən (10-45 dəqiqə) sonra əldə edilir. Bir dəfəlik25-50 mq doza qəbulundan sonra ”konsentrasiya-vaxt” əyrisi altındakı sahə (AUC) həm əzələdaxili, həm də venadaxili tətbiq üçün eynidir. Müvafiq farmakokinetik parametrlər, tək və təkrari əzələdaxili və ya venadaxili tətbiqdən sonra oxşardır və kumulyasiya olmadığını göstərir.
Paylanması
Deksketoprofen trometamol plazma zülalları ilə yüksək birləşmə aktivliyinə malikdir (99%). Paylanma həcmi ortalama 0,25 l/kq-dan aşağı deyil, yarımpaylanma müddəti təxminən 0,35 saatdır.
Xaric olması
Qlükuron turşusu ilə birləşir, daha sonra metabolit şəklində böyrəklər vasitəsilə ifraz olunur. Yarımxaricolma dövrü təxminən 1-2,7 saatdır.
Yaşlı pasiyentlər
Yaşlı xəstələrdə yarımxaricolma dövrü (həm tək, həm də təkrari əzələdaxili və ya venadaxili tətbiqdən sonra) orta hesabla 48%-ə qədər uzanır, dərmanın ümumi klirensi azalır.

İstifadəsinə göstərişlər
Oral yolla qəbul uyğun olmadıqda əməliyyatdan sonrakı ağrı, böyrək sancısı və aşağı bel nahiyəsindəki kəskin ağrıların (ağırlıq dərəcəsi orta və ağır) simptomatik müalicəsi.

Əks göstərişlər
Aşağıdakı hallarda SAKURAT qəbul etmək olmaz:

• deksketoprofen trometamola və ya SAKURAT-ın tərkibindəki hər hansı bir komponentə qarşı allergiya (yüksək həssaslıq);
• aspirinə və ya digər QSİƏP-lərə qarşı allergiya;
• asetilsalisil turşusu və ya digər QSİƏP-in qəbulundan sonra sinədə xırıltı, astma və ya astma tutmaları, kəskin allergik rinit (burun selikli qişasının qısa müddətli iltihabı), burun polipləri (allergiya-mənşəli burnun selikli qişaların törəmələri), dəri səpgiləri, angionevrotik ödem (üzün, gözlərin, dodaqların şişməsi və ya tənəffüsün çətinləşməsi);
• ketoprofen (QSİƏP) və ya fibratların (qanda aterogen lipidlərin miqdarını azaldan dərmanlar) qəbulundan sonra fotoallergik və ya fototoksik reaksiyalar (günəş işığından dəridə yaranan qızartı və/və ya səpgilərin əmələ gəlməsi);
• peptik xora, mədə və ya bağırsaq qanaxması, əvvəllər keçirilmiş mədə və ya bağırsaq qanaxması, peptiki xora və ya perforasiya;
• anamnezində QSİƏP istifadəsindən sonra yaranan, mədə və ya bağırsağın qanaxması və ya perforasiyası;
• xroniki həzm pozğunluqları (məsələn, qıcqırma);
• bağırsağın xroniki iltihabi xəstəliyi (Kron xəstəliyi və ya xoralı kolit);
• ağır ürək çatışmazlığı, orta dərəcəli və ya ağır böyrək çatışmazlığı və ya ağır qaraciyər problemləri;
• qanda laxtalanmanın pozulması;
• qusma, ishal (mayenin böyük həcmdə itirilməsi) və ya kifayət qədər maye qəbul edilməməsi səbəbindən bədənin ciddi dərəcədə susuzlaşması;
• hamiləliyin üçüncü trimestri və ya ana südü ilə qidalanma dövrü.

Xüsusi göstərişlər və ehtiyat tədbirləri

• anamnezində bağırsağın xroniki iltihabi xəstəliyi (xoralı kolit, Kron xəstəliyi) olanlar;
• əvvəllər və ya hal-hazırda mədə və ya bağırsaq problemlərindən əziyyət çəkənlər;
• qanaxma riskini artıran və ya mədə-bağırsaq xorası törətmə riski daşıyan dərmanların qəbulu, məsələn, peroral steroidlər, bəzi antidepressantlar (selektiv serotonin geri udulmasının inhibitorları), antiaqreqantlar (aspirin), antikoaqulyantlar (varfarin). Belə hallarda, SAKURAT-ı qəbul etməzdən əvvəl həkiminizlə məsləhətləşin: həkim Sizə mədənizi qorumaq üçün əlavə bir dərmanları qəbul etməyinizi tövsiyə edəcək (misoprostol və ya mədə turşusunun sintezini inhibə edən dərmanlar);
• Sizdə ürək problemi varsa və ya insult keçirə biləcəyinizi düşünürsüzsə (məsələn, yüksək qan təzyiqiniz, şəkərli diabet, qanda xolesterinin miqdarı yüksəkdirsə və ya siqaret çəkirsinizsə) müalicə həkiminiz və ya əczaçınızla məsləhətləşin, SAKURAT kimi dərmanlar çox kiçik də olsa ürək tutmaları (miokard infarktı) və ya insult keçirmə riskinin artmasına səbəb ola bilər. Yüksək dozalarda və uzunmüddətli müalicə zamanı risk daha çox ehtimal olunur. Tövsiyə olunan dozanı və ya müalicə müddətini aşmayın;
• yaşlılarda əlavə təsirlərin olma ehtimalı daha yüksəkdir. Bu hallarda hər hansı biri baş verərsə, dərhal həkiminizə müraciət edin;
• allergiyadan əziyyət çəkirsinizsə və ya əvvəllər allergiya ilə bağlı probleminiz olmuşdursa;
• sizdə böyrək, qaraciyər və ya ürək problemi (hipertoniya və/və ya ürək çatışmazlığı), həmçinin orqanizmdə mayenin ləngimə problemi varsa və ya əvvəllər bu problemlərdən hər hansı biri olmuşdursa;
• diuretik qəbul edirsə və ya həddindən artıq maye itkisinə görə qan həcminin azalmasından əziyyət çəkirsinizsə (məsələn, həddindən artıq sidik ifrazı, ishal və ya qusma);
• sonsuzluqla bağlı problemi olan qadınlar (bu səbəbdən hamilə qalmağı planlaşdırırsınızsa, SAKURAT Sizin hamiləqalma qabiliyyətinizi azalda bilər);
• hamiləliyin birinci və ya ikinci trimestri;
• qanyaranma və qan hüceyrələrinin əmələ gəlməsində baş verən pozulmalar;
• sistemli qırmızı qurdeşənəyi və ya birləşdirici toxumanın sistem xəstəlikləri (immunitet sistemin patologiyaları hesabına birləşdirici toxumanın zədələnməsi);
• astmadan əziyyət çəkən və yanaşı olaraq xroniki rinit, xroniki sinusit və/və ya burun polipləri olan xəstələr də asetilsalisil turşusu və/və ya QSİƏP-lərə qarşı allergiya riski digərlərindən daha yüksəkdir. Bu dərmanın qəbulu xüsusilə, asetilsalisil turşusu və ya QSİƏP-ə qarşı allergiyası olan;
• xəstələrdə astma tutmalarına və ya bronxospazma səbəb ola bilər;
• suçiçəyi: müstəsna hallarda QSİƏP infeksiyanı ağırlaşdıra bilər;
• QSİƏP qanaxma, xora və perforasiya daxil olmaqla mədə-bağırsaqlarda ciddi fəsadlara səbəb ola bilər ki, bu da ölümcül ola bilər. Bu fəsadlar dərmandan istifadə zamanı istənilən vaxt və əvvəlki klinik əlamətlər ilə və ya əlamətlər olmadan baş verə bilər. Yaşlı xəstələrdə ciddi mədə-bağırsaq fəsadlarının olma riski daha da yüksəkdir.

Əvvəlki klinik əlamətlərə uyğun əlamətlər muşahidə etdikdə, həkiminizi məlumatlandırın.
SAKURAT-ın tərkibindəki bəzi maddələr haqqında vacib məlumatlar
Hər bir SAKURAT ampulunda 12,35% etanol (spirt) var, yəni, 200 mq-a qədər dozada 5 ml pivə və ya 2,08 ml şəraba bərabərdir. Alkoqolizmdən əziyyət çəkənlər üçün zərərlidir. Hamilə və ya süd verən qadınlarda, uşaqlarda, qaraciyər xəstələri və ya epilepsiya xəstələri kimi yüksək risk qruplarında nəzərə alınmalıdır.
Bu dərman məhsulu doza başına 1 mmol az natrium (23 mq) saxlayır; bu dozada natriumla əlaqəli yan təsir gözlənilmir.

Digər dərman maddələri ilə qarşılıqlı təsiri 
SAKURAT-la yanaşı aşağıdakı dərmanlardan birini qəbul edirsinizsə və ya qəbul etmək istəyirsinizsə, həkiminizi, diş həkiminizi və ya əczaçınızı məlumatlandırın. Bəzi preparatlar var ki, onlar SAKURAT-la birlikdə qəbul edilməməlidir və ya birlikdə qəbul edildikdə doza korreksiyası tələb oluna bilər.
Arzuolunmaz kombinasiyalar:
• Asetilsalisil turşusu (aspirin), kortikosteroidlər və ya digər iltihab əleyhinə preparatlar.
• Varfarin, heparin və ya laxtalanmanın qarşısını almaq üçün istifadə olunan digər preparatlar.
• Əhval-ruhiyyə pozulmalarını müalicə etmək üçün istifadə olunan litium preparatları.
• Revmatoid artritin (oynaqlarda ağrı və deformasiyaya səbəb olan uzunmüddətli (xroniki) vəziyyət) və xərçəngin müalicəsi üçün istifadə olunan metotreksat preparatı.
• Epilepsiya əleyhinə istifadə olunan hidantoinlər və fenitoin.
• Bakterial infeksiyalar üçün istifadə olunan sulfametoksazol.
Diqqət tələb edən kombinasiyalar:
• Ürək xəstəliklərində və yüksək qan təzyiqində istifadə edilən AÇF inhibitorları, diuretiklər, β-adrenoblokatorlar və angiotenzin II antaqonistləri.
• Xroniki venoz xoraların müalicəsində istifadə olunan pentoksifillin və okspentifillin preparatı.
• Virus infeksiyalarının müalicəsində istifadə olunan zidovudin preparatı.
• Bakterial infeksiyaların müalicəsində istifadə olunan aminoqlikozid qrupu antibiotiklər (gentamisin, amikasin və s.)
• Şəkərli diabetdə istifadə olunan xlorpropamid və qlibenklamid.
Nəzərə alınması tələb olunan kombinasiyalar:
• Bakterial infeksiyaların müalicəsində istifadə olunan xinolon qrupu antibiotikləri (məs,. siprofloksasin, levofloksasin).
• İmmun sistemi xəstəliklərinin müalicəsində və orqan transplantasiyasında istifadə olunan siklosporin və ya takrolimus preparatı.
• Streptokinaza və digər trombolitik və ya fibrinolitik preparatlar (qan laxtalarını parçalamaq üçün istifadə olunan preparatlar).
• Podaqranın müalicəsi üçün istifadə olunan probenesid preparatı.
• Xroniki ürək çatışmazlığının müalicəsində istifadə olunan diqoksin preparatı.
• Tibbi abortda istifadə olunan mifepriston (hamiləliyi dayandırmaq üçün) preparatı.
• Selektiv serotonin geri udulmasının inhibitorları (SSGUİ) kimi antidepressantlar.
• Trombositlərin aqreqasiyasını azaldaraq trombəmələgəlmənin qarşısını alan antiaqreqantlar.
Reseptsiz satılan dərmanlar da daxil olmaqla başqa hər hansı bir dərman qəbul edirsinizsə və ya qəbul etmisinizsə, həkiminizi və ya əczaçınızı məlumatlandırın.

Hamiləlik və laktasiya dövründə istifadəsi
Hamiləlik
Preparatı qəbul etməzdən əvvəl həkim və ya əczacıyla məsləhətləşin.
Hamiləliyin üçüncü trimestrində SAKURAT istifadə etməyin.
Hamilə olduğunuz və ya hamilə qalmağı planlaşdırdığınız təqdirdə, SAKURAT-ın sizin üçün uyğun olub-olmayacağını bilmək üçün həkiminizi xəbərdar edin. Hamilə qalmağı planlaşdıran və ya hamilə olan qadınlar SAKURAT-ın istifadəsindən çəkinməlidirlər. Hamiləliyin istənilən mərhələsində müalicə yalnız həkimin göstərişi ilə həyata keçirilməlidir.
Müalicə zamanı hamilə olduğunuzu bildiyiniz halda dərhal həkiminizi və ya əczaçınızı məlumatlandırın.
Laktasiya
Preparatı qəbul etməzdən əvvəl həkim və ya əczaçıyla məsləhətləşin.
Əgər uşaq əmizdirirsinizsə SAKURAT istifadə etməyin.

Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
SAKURAT-la müalicə zamanı başgicəllənmə və ya yuxululuq vermə ehtimalı səbəbiylə, nəqliyyat vasitələrini idarəetmə qabiliyyətinizə təsir edə bilər. Belə təsirlər baş verdiyi hallarda simptomlar yox olana qədər  digər potensial təhlükəli mexanizmləri və nəqliyyat vasitələrini idarə etməyin.

İstifadə qaydası və dozası
Bu dərman preparatını həmişə həkiminizin dediyi qaydada qəbul edin. Əmin olmadığınız halda həkiminizə müraciət edin.
Simptomların növünə, ağırlıq dərəcəsinə və müddətinə görə həkiminiz sizə hansı dozada SAKURAT-a ehtiyacınız olduğunuz barədə məlumat verəcəkdir. Tövsiyə olunan doza adətən hər 8-12 saatdan bir, 1 ampul (50 mq) SAKURAT təyin olunur. Lazım gələrsə inyeksiya 6 saatdan sonra təkrarlana bilər. Heç bir halda SAKURAT-ın ümumi gündəlik dozasını 150 mq-ı (3 ampul) keçməməlidir. İnyeksion müalicədən yalnız kəskin dövrdə istifadə edin (yəni 2 gündən çox olmayaraq). Mümkün olan hallarda ağrıkəsici tabletlərdən istifadə edin.
Tətbiq formaları
SAKURAT həm əzələdaxili, həm də venadaxili tətbiq oluna bilər. SAKURAT əzələdaxili yeridildikdə inyeksiya məhlulu rəngli ampul açıldıqdan dərhal sonra əzələ daxilinə dərin yeridilərək vurulmalıdır. Preparat 15 saniyədən az olmamaq şərtilə yavaş venadaxili bolyus şəklində yeridilə bilər. Yalnız şəffaf, rəngsiz məhlul istifadə edilməlidir.
Müxtəlif yaş qrupları
Uşaqlarda və yeniyetmələrdə istifadəsi
Deksketoprofen trometamol uşaq və yeniyetmələrdə tədqiq olunmamışdır (<18 yaş). Bu səbəbdən təhlükəsizlik və effektivliliyi öyrənilməmişdir və SAKURAT uşaq və yeniyetmələrdə istifadə edilməməlidir.
Yaşlılarda istifadəsi
Böyrək funksiyası pozulmuş yaşlı insanlar gündəlik SAKURAT 50 mq (1 ampul) doza həddini keçməməlidir.
İstifadə zamanı xüsusi şərtlər
Böyrək/qaraciyər çatışmazlığında
Böyrək və ya qaraciyər problemləri olan xəstələr ümumi gündəlik SAKURAT 50 mq (1 ampul) dozasını keçməməlidir.
SAKURAT-ın təsirinin çox güclü və ya çox zəif olduğu barədə təəssüratınız yaranarsa həkiminizə və ya əczaçınıza məlumat verin.

Əlavə təsirləri
Aşağıdakı hallardan hər hansı birini gördükdə, SAKURAT-ı qəbul etməyi dayandırın və dərhal həkiminizə və ya ən yaxın xəstəxananın təcili yardım şöbəsinə müraciət edin.
• Anafilaktik reaksiya (kollapsa səbəb ola biləcək yüksək həssaslıq reaksiyası)
• Ağız, göz və cinsiyyət orqanlarının selikli qışasında xora (Stivens-Conson və Layell sindromu)
• Üzün, dodaqların və ya boğazın şişməsi (angionevrotik ödem)
• Tənəffüs yolları əzələlərinin yığılması səbəbindən nəfəs darlığı (bronxospazm).
Bunların hamısı çox ciddi əlavə təsirlərdir. Bunlardan hər hansı biri varsa, deməli SAKURAT-a qarşı ciddi allergiyanız var. Təcili tibbi yardıma ehtiyacınız ola bilər.
Çox ciddi yan təsirlər çox nadir hallarda müşahidə olunur.
Əlavə təsirlərin tezliyi aşağıdakı parametrlərlə təyin edilir: çox tez-tez (≥1/10); tez-tez (≥1/100-<1/10); bəzən (≥1/1000-<1/100); nadir hallarda (≥1/10000-<1/1000); çox nadir hallarda (<1/10000); məlum deyil (əldə olan məlumatlar görə tezliyi qiymətləndirmək mümkün deyil).
Ümumi əlavə təsirlər
• Ürəkbulanma və/və ya qusma
• İnyeksiya yerində ağrı
• İnyeksiya yerində iltihab, göyərmə və ya qanaxma kimi reaksiyalar
Bəzən baş verən əlavə təsirlər
• Qanlı qusma
• Qan təzyiqinın aşağı düşməsi
• Yüksək temperatur
• Bulanıq görmə
• Başgicəllənmə
• Yuxululuq
• Yuxu pozulmaları
• Baş ağrısı
• Anemiya
• Qarın nahiyəsində ağrı
• Qəbizlik
• Həzm problemləri
• İshal
• Ağızda quruluq
• Qızartı
• Səpgi
• Dermatit
• Qaşınma
• Tərləmənin artması
• Yorğunluq
• Ağrı
• Soyuqluq hissi
Nadir əlavə təsirlər
• Peptiki xora, mədə xorasının qanaxması və ya mədə xorasının perforasiyası
• Qan təzyiqinin yüksəlməsi
• Huşun itməsi
• Zəif nəfəs alma
• Qan laxtalanması səbəbindən damar daxili təbəqəsinin iltihabı (səthi tromboflebit)
• Təcrid olunmuş ürək vurğuları (ekstrasistoliya)
• Ürək döyüntüləri
• Periferik ödem (əl və ayaqların şişməsi)
• Qırtlaq ödem (səs tellərinin şişməsi)
• Qızdırma və titrəmə hissi
• Qulaqlarda küy
• Qaşıntılı səpgi
• Sarılıq
• Sızanaq
• Bel nahiyəsində ağrı
• Tez-tez sidiyə getmə
• Aybaşı pozulmaları
• Prostat problemləri
• Əzələ gərginliyi
• Oynaq gərginliyi
• Əzələ qıcolmaları
• Qeyri-normal qaraciyər testləri (qan testləri), qanda şəkərinin artması (hiperqlikemiya), qanda şəkərinin azalması (hipoqlikemiya), qanda triqliseridlərin konsentrasiyasının artması (hipertriqliseridemiya), sidikdə keton cisimləri (ketonuriya), sidikdə zülal (proteinuriya)
• Qaraciyər hüceyrələrinin zədələnməsi (hepatit)
• Kəskin böyrək çatışmazlığı
Çox nadir hallarda
• Nəfəs darlığı
• Pankreatit
• Dərinin həssaslığının və dərinin işığa qarşı həssaslığın artması, Stivens-Conson sindromu, toksik epidermal nekroliz, angioödem.
• Böyrəklərin zədələnməsi
• Leykositlərin sayının azalması (neytropeniya)
• Trombositlərin sayının azalması (trombositopeniya)
Müalicənin başlanğıcında mədə-bağırsağa aid əlavə təsirlər (mədədə ağrı, qıcqırma və ya qanaxma) görsəniz və əvvəllər də uzunmüddətli iltihab əleyhinə preparatların istifadəsi zamanı buna oxşar əlavə təsirlərdən əziyyət çəkmisinizsə dərhal həkiminizi məlumatlandırın, xüsusilə də yaşlı birisinizsə.
Dəridə səpgilər və ya selikli qişalarda (ağız boşluğu kimi) hər hansı bir zədələnmə və ya hər hansı bir allergiya əlaməti müşahidə olunarsa SAKURAT istifadə etməyi dayandırın.
QSİƏP-lə müalicə zamanı mayenin toxumalarda toplanması və ödem (xüsusilə topuq nahiyəsi və ayaqlarda) hesabına ürək çatışmazlığı və qan təzyiqinin artması müşahidə oluna bilər. SAKURAT kimi dərmanlar infarkt və ya insult yarada bilən dərmanlardan çox cüzi risk daşıyan dərmanlar qrupuna aid olsada.
Sistemli qırmızı qurdeşənəyi və ya birləşdirici toxumanın sistem xəstəlikləri (immunitet sistemin patologiyaları hesabına birləşdirici toxumanın zədələnməsi) olan şəxslərdə, iltihab əleyhinə dərmanlar nadir hallarda qızdırma, baş ağrısı və boyun arxası sahənin sərtliyinə səbəb ola bilər.
SAKURAT istifadə edərkən infeksiya əlamətləri inkişaf etsə və ya ağırlaşsa dərhal həkiminizə bildirin.
Əlavə təsirlərdən birinin ciddiləşdiyini və ya bu içlikdə göstərilməyən hər hansı bir əlavə təsir müşahidə olunarsa, həkiminizə və ya əczaçınıza məlumat verin.

Doza həddinin aşılması 
Təyin ediləndən çox SAKURAT istifadə edirsinizsə, həkimizi və ya əczaçınızı məlumatlandırın.
Xahiş olunur bu dərmanın qutusunu və ya bu içlik vərəqini özünüzlə götürməyi unutmayın.
SAKURAT istifadə etməyi unutmusunuzsa:
Unudulmuş dozanın əvəz etmək üçün ikiqat doza qəbul etməyin.
Növbəti müntəzəm doza vaxtı gəldikdə istifadə edin ("SAKURAT-dan istifadə qaydaları"-na əsasən)

Buraxılış forması
2 ml məhlul, ampulda. 6 ampul, içlik vərəqə ilə birlikdə karton qutuya qablaşdırılır.

Saxlanma şəraiti
25ºС-dən yuxarı olmayan temperaturda, işıqdan qorumaqla və uşaqların əli çatmayan yerdə orjinal qutusunda saxlamaq lazımdır.
Ampul açıldıqdan dərhal sonra istifadə olunmalıdır.
SAKURAT 50 mq / 2 ml IM/IV inyeksiya üçün məhlul, 2-8ºC arasında saxlanılmışdırsa, o zaman istifadədən qabaq otaq şəraitində 2 saat işıqdan qorunaraq saxlanılmalıdır.

Yararlılıq müddəti
2 il
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı
DEVA Holding A.Ş. TURKEY
Dumlupinar Mahallesi. Ankara Caddesi No: 2 Kartepe-Kocaeli/Turkey.

Qeydiyyat vəsiqəsinin sahibi:
PRUDENS PHARMA LP, Şotlandiya.

Məhsulun və əmtəə nişanının sahibi:
PRUDENS PHARMA LP, Şotlandiya.